البنت بعد الرجوع من العزيمة
هي
يوووه فاتك نص عمرك.. توني جايه من العزيمة
أختها
وش حطوا؟
هي
يو يو يو ، حطهم يجنن، ما فيه شي ماحطوه ، أول شي الشاهي، كاساتهم تجنن مزخرفه ومسكاتها ذهبيه ، بعدين الحلى مدري من فين جايبينه طعمه يجنن وحاطينه في صواني تلللمع وفيها نقط صغيييره لونها أخضر ، والمكسرات تموووووت من الطعم اللى يهبل ، حاطين كل نوع في صحن
والا العشا ياربييييي يهبببببل(يستمر وصف الاكل ساعة ونصف)
أختها
جات نوف؟
هي
ايه جت، يالله لبسها يجنن، لابسه فستان وردي مطرز بكرستال بني ، لبسها من جد ياخذ العقل
أختها
لايكون نفس اللي لبسته قبل 5 سنوات؟
هي
لا لا ذيك المره لابسه فستان أحمر مو وردي ولا كان فيه كرستالات
اختها
أجل شكلها لابسه فستان بنت عمها أريج لاني شايفه اللبس هذا عليها
هي
اي والله، يووووه وش هالفشيله، والله انها ماتستحي ؟ لا وأريج تدرين وش لابسه ؟ اليوم لابسه ويع يفشل تدرين انها فشلتنا قدام الضيوف الظاهر انها شاريته من أبو ريالين
أختها
وجزمتها؟
هي
ما أدري ماشفتها، تصدقين طول العزيمه وانا احاول اشوف الجزمة لكن ماقدرت، حتى اني يوم طفشت في الاخير طيحت شنطتي تحت الكرسي حقها على بالي ما ادري ونزلت راسي اخذ الشنطة عشان اقدر اشوف الجزمة بس ماقدرت، لبسها كان طويل مرة ومغطي رجولها
اختها
:اكيد جزمتها مثل لبسها يحوم الكبد .. هي دايم كذا ذوقها مو حلو ...طيب ومكياجها كيف كان؟
هي
وععععع ، مكياجها مخليها اكبر من امها، تخيلي حاطة روج بني، الظاهر انه ديرم مو روج، والله المسكرة بعد يووووووووه مالها داعي، ما ادري مين النذلة اللي حاطه لهااالمكياج ، شكلها زوجة ابوها
اختها
طيب وتسريحة الشعر
هي
حقت مين؟ نوف والا اريج؟
اختها
كلهم
هي
تسريحة نوف حلوة، حاطة شباصة فضية وبكلة وردية، ومشابك برونزية والشعر صابغته بلون كحكحي لكنه يهببببل،
اختها
كحكحي؟ يعني ايش؟
هي
ماتعرفين الكحكحي ؟ هذا لون جديد للصبغات ، اذا شفتيه تجيك الكحه من زينه حتى سألتها وين مصلحه شعرها فيه ورفضت تعلمني ، اما اريج تسريحة شعرها باييييخة، شفتي تسريحة خدامتنا جيناتا وهي تغسل المواعين؟ نفسها بالضبط
اختها
على طاري الخدامة؟ خدامة اريج وش لابسه
هي
الخدامة لبسها عادي، لكن جزمتها حلوووه ، تهبل ماكأنها جزمة خدامة، لونها اسود وعليها خيوط فسفورية
اختها
صدق والله؟ هذي مو جزمة اريج؟
هي
الا والله؟ وانا اقول وين شفت ذا الجزمة فيه .. هذي جزمتها قبل عشر طعش سنة، اتذكرها شكلها عطتها الخدامة بدل ماتحطها في الزباله .
( ويستمر الحش إلى صلاة الفجر )

-----------
الولد بعد الرجوع من العزيمة
هو
السلام عليكم، توني جاي من العزيمة وترا كل الشباب يسلمون عليك
انتهت المحادثة